सस्तो खसी शुक्रबारबाट पाइने, संस्थान भन्छ– ३० किलोको खसीमा ३ सय रुपैयाँ छुट

सस्तो खसी शुक्रबारबाट पाइने, संस्थान भन्छ– ३० किलोको खसीमा ३ सय रुपैयाँ छुट

काठमाडौं । नेपाल खाद्य संस्थानले शुक्रबारबाट खसीबोका र च्यांग्रा बिक्री सुरु गर्ने भएको छ । संस्थानले बिहीबारसम्म खसीबोका तथा च्यांग्र्रा काठमाडौं भित्र्याएपछि बिक्री गर्ने जनाएको छ ।

संस्थानका प्रवक्ता शंकर सापकोटाका अनुसार मुस्ताङबाट हिँडाएका च्यांग्रा म्याग्दी आएर बुधबार लोड भएका छन् । ती च्यांग्रा बिहीबार बिहान काठमाडौं आइपुग्छन् । यसैगरी वीरगञ्जमा खरिद भएका खसी पनि बुधबार लोड भएका छन्, ति पनि बिहीबार नै काठमाडौं आइपुग्ने भएकाले एकदिन विश्राम दिएर शुक्रबारबाट बिक्री थालिने भएको हो ।

यसअघि २५ गतेदेखि खाद्य संस्थानले खसीबोका तथा च्यांग्रा बिक्री गर्ने बताएको भएपनि त्यो सम्भव नभएको हो । बाह्रखरीसँग उनले भने, “मुस्ताङबाट हिँडाउने क्रममा एकदिन अवरोध भएपछि च्यांग्रा काठमाडौं आउने दिन टाढिएको हो ।”

चौपाया बिक्री गर्ने मिति तोकेपनि खसीको मूल्य भने निर्धारण भइसकेको छैन । यसअघि सरकारको निर्देशनअनुसार प्रतिकिलो १० रुपैयाँ छुट दिने तयारी संस्थानले गरेको छ । सापकोटाले भने, “आज साँझसम्म मूल्य निर्धारण गर्ने योजना बनाएका छौं । बिक्री पर्सि (शुत्रबार)बाट मात्र सुरु हुन्छ ।”

उनका अनुसार संस्थानले बिक्री गर्ने खसी बजारमा पाइनेभन्दा केही सस्तो हुनेछ । सापकोटाले भने, “३० किलोको खसीमा खरीदकर्ताले ३ सय रुपैयाँको छुट पाउनेछन् ।”

दसैंको अवसरमा संस्थानले राजधानीमा हरेक वर्ष छुटसहित खसीबोका र च्यांग्र्रा बिक्री गर्दै आएको छ ।

संस्थानले बिक्री गर्ने खसीबोका तथा च्यांग्रा नेपाल खाद्य संस्थानको बागमती अञ्चल कार्यालय, थापाथलीबाट बिक्री वितरण गर्ने संस्थानले जनाएको छ । संस्थानले यसअघि नै एक हजार खसीबोका र एक हजार च्यांग्र्रा बिक्री गर्ने जानकारी गराइसकेको छ ।
अघिल्लो वर्ष संस्थानले १५ सय खसीबोका र एक हजार च्याङग्रा ल्याएको थियो ।

“खसीबोका तथा च्यांग्रा कसरी किन्ने ?” भन्ने प्रश्नमा संस्थान प्रवक्ता सापकोटाले एकैस्वरमा भने, “संस्थानको थापाथली कार्यालय जानुस्, लाममा बस्नुस् । आफ्नो पालो आएपछि आफूलाई मन परेको खसी छान्नुस् । त्यसपछि संस्थानका कर्मचारीले खसीको वजन तौलिन्छन्, त्यहीअनुसारको बिल आउँछ । केही झण्झट छैन । भीड छैन भने त अझ लाममा बस्नु पनि पर्दैन ।”
 

प्रतिकृया दिनुहोस