प्रवास

दश वर्षमा एक लाखभन्दा बढी नेपालीले पाए अमेरिकामा ग्रिनकार्ड

दश वर्षमा एक लाखभन्दा बढी नेपालीले पाए अमेरिकामा ग्रिनकार्ड

काठमाडौं । विभिन्न वहानामा अमेरिका पुगेका नेपालीमध्ये १ लाखभन्दा बढीले पछिल्लो १० वर्षमा ग्रिनकार्ड लिएको पाइएको छ । केहीले शरणार्थीको हैसियत माग गर्दै ग्रिनकार्ड लिएका छन् त केहीले कार्यक्षमताको आधारमा । केहीले डाइभर्सिटी भिसा (डिभी) मार्फत् त केहीले अमेरिकी नागरिकको नातेदार भएको प्रमाण पु¥याएर ग्रिनकार्ड लिएको देखिन्छ ।

अमेरिकी सरकारले निश्चित मापदण्ड पूरा गर्ने आप्रवासीहरुलाई अमेरिकामा स्थायी बसोबास (पीआर) अर्थात् ग्रिनकार्ड उपलब्ध गराउँदै आएको छ । अमेरिकाले प्रत्येक वर्ष १ लाखभन्दा बढी आप्रवासीलाई स्थायी बसोबासको लागि ग्रिनकार्ड उपलब्ध गराउँदै आएको छ । 

अमेरिकी डिपार्टमेन्ट अफ होमल्याण्ड सेक्युरिटीले हालै सार्वजनिक गरेको नयाँ तथ्याङ्कअनुसार सन् २००८ देखि २०१८ मार्च सम्मको १० वर्ष ३ महिनाको अवधिमा १ लाख २ हजार ७ सय ५५ नेपालीले अमेरिकामा स्थायी बसोबासको लागि ग्रिन कार्ड पाएका छन् । यो अवधिमा २ लाख १९ हजार ३ सय ५९ नेपाली विभिन्न भिसामा अमेरिका पुगेको देखिन्छ । 

होमल्याण्ड सेक्युरिटीको तथ्याङ्कअनुसार पछिल्लो ७ वर्षयता प्रत्येक वर्ष १० हजारभन्दा बढी नेपालीले ग्रिनकार्ड पाएका छन् । सबैभन्दा बढी सन् २०१३ मा १३ हजार ४६ नेपालीले ग्रिनकार्ड पाएको देखिन्छ ।   

सन् २००८ मा ४ हजार ९३, २००९ मा ४ हजार ५ सय १४, २०१० मा ७ हजार १ सय १५, २०११ मा १० हजार १ सय ६६, २०१२ मा ११ हजार ३ सय १२, २०१३ मा १३ हजार ४६, २०१४ मा १२ हजार ३ सय ५७, २०१५ मा १२ हजार ९ सय २६, २०१६ मा १२ हजार ८ सय ५१ र सन् २०१७ मा ११ हजार ६ सय १० जना नेपालीले अमेरिकामा ग्रिनकार्ड पाएका छन् । सन् २०१८ को पहिलो तीन महिना (जनवरी, फेव्रुअरी र मार्च) मा २ हजार ७ सय ६५ जना नेपालीले अमेरिकी ग्रिनकार्ड पाइसकेका छन् । 

पछिल्लो वर्ष करिब ४० हजारको हाराहारीमा नेपाली विभिन्न भिसामा अमेरिका पुगेको देखिन्छ । यीमध्ये कति फर्किन्छन् र कति त्यहीँ बसेर ग्रिनकार्डको लागि आवेदन दिने गरेको पाइन्छ । सन् २०१६ मा मात्र ३५ हजार ६ सय ७२ नेपालीले पहिलो पटक अमेरिकामा पाइला टेकेका थिए । यो वर्ष ५३ हजार ६ सय ४५ अमेरिकी नेपाल आएका थिए ।  

होमल्याण्ड सेक्युरिटीको तथ्याङ्कअनुसार सन् २०१७ मा अमेरिकामा ग्रिनकार्ड पाउने ११ हजार ६ सय १० नेपालीमध्ये शरणार्थीको हैसियत माग्दै ३ हजार २ सय ८७, डिभी मार्फत ३ हजार २ सय ५, रोजगार मार्फत १ हजार ३ सय ५५, अमेरिकी नागरिकसँगको सम्बन्धको कारण २ हजार ६ सय ८४, आफ्नो परिवारको सदस्यका कारण १ हजार ६४ र अन्य कारण १५ जनाले ग्रिन कार्ड पाएको देखिन्छ । 

सबैभन्दा बढी न्यूयोर्क क्षेत्रमा बस्ने नेपालीले ग्रिनकार्ड पाएको देखिन्छ । सन् २०१७ मा न्यूयोर्कबाट १ हजार १ सय ९७ जना नेपालीले ग्रिनकार्ड पाएका थिए । यस्तै, वासिङ्टनमा बस्ने ८ सय ६५, सनफ्रान्सिस्कोमा बस्ने ४ सय ३५, लस एन्जलसमा बस्ने २ सय ४९, डलासमा बस्ने ९ सय ६८, बोस्टनमा बस्ने ३ सय ९३, बाल्टीमोरमा बस्ने ४ सय ७८ नेपालीले ग्रिनकार्ड पाएका थिए । अमेरिकाको प्रायः सबै राज्यबाट नेपालीले ग्रिनकार्ड पाएका छन् । 
 

तपाईंको मत