राजनीति

देउवालाई सुजाताको प्रश्न–हामीसँग सल्लाह लिन किन डराउनुभएको ? 

देउवालाई सुजाताको प्रश्न–हामीसँग सल्लाह लिन किन डराउनुभएको ? 

काठमाडौं । नेपाली कांग्रेसकी प्रभावशाली नेतृ एवम् सांसद सुजाता कोइरालाले पार्टी सभापति शेरबहादुर देउवालाई आफूहरुसँग सल्लाह र सुझाव लिन किन डराएको भन्दै प्रश्न गरेकी छिन् ।  रिपोर्टर्स क्लब नेपालले आज आयोजना गरेको देउसी–भैलो कार्यक्रममा पत्रकारहरुसँग संक्षिप्त कुराकानी गर्दै नेतृ कोइरालाले यस्तो बताएकी हुन् । उनले भनिन्, “सभापतिज्यू, हामीसँग सल्लाह लिन किन डराउनुभएको हो ?”

उनले भनिन्, “सभापतिज्यूले उपसभापति मनोनित गर्नुभयो । तर, हामीसँग सल्लाह लिनुभएन । सल्लाह लिएको भए राम्रो हुनेथियो ।” पार्टीलाई एक ढिक्का बनाएर अघि बढाउनको लागि पनि सहमति, सहकार्य र एकताको आवश्यकत्ता रहेको बताउँदै सभापतिले त्यस्तो भूमिका निर्वाह गर्नुपर्ने उनको भनाई थियो । 

उनले भनिन्, “सभापतिज्यू, कुनै एक गुटकोजस्तो सभापति बन्नुभएन । अब सिँगो पार्टीको सभापति बन्नुपर्यो ।” पूर्व उपप्रधानमन्त्री समेत रहेकी नेतृ कोइरालाले सभापति देउवाले पार्टीभित्रको गुटलाई अन्त्य गर्न नसकेको आरोप लगाईन् । 
उनले भनिन्, “पार्टीलाई विधि र प्रक्रियाअनुसार अघि बढाउनुपर्छ । अनुशासनमा चलाउनुपर्यो ।”

सभापति देउवाको यो कार्यकाल अन्तिम पटक हुनसक्ने संकेत गर्दै उनले यस्तो बेलामा पनि सबैलाई एकजुट बनाएर लैजान नसक्नु दुःखद् भएको गुनासो पोखिन् । 
 

तपाईंको मत