Skip Advt.

साहित्य र कला

नेपालमा भेटिँदैनन् तिज गायकगायिका, अमेरिकादेखि दिल्लीसम्मका कार्यक्रममा भ्याईनभ्याई

नेपालमा भेटिँदैनन् तिज गायकगायिका, अमेरिकादेखि दिल्लीसम्मका कार्यक्रममा भ्याईनभ्याई

काठमाडौं । मंगलबार बिहान लोकदोहोरी गायिका मुना थापा मगरले आफ्नो फेसबुक अकाउन्टमा तस्बिरसहितको स्टाटस पोष्ट गरिन्, “धेरैधेरै धन्यवाद आयोजक नेपाली साझा समाज जापान र गुन्माकेनमा रहनुहुने उपस्थित सबैजनालाई माया अनि साथका लागि ।” गुन्माकेनको कार्यक्रम अगाडि उनी जापानमै अर्को तिज कार्यक्रममा थिइन् । फुकुओका नेपाल सोसाइटी फुकुओका जापानले आयोजना गरेको गरेको तिज धमाका–२०१८ मा उनले आफ्नो प्रस्तुति दिएकी थिइन् । 

त्यसअघि टोकियोमा नवलपरासी समाजले आयोजना गरेको कार्यक्रममा पनि उनको प्रस्तुति थियो तर फ्लाइट क्यान्सिल भएपछि उनी सहभागी हुन सकिनन् । मुना तिजको कार्यक्रमका क्रममा यतिबेला जापानमा छिन् । मुना अक्सर कुनै पनि तिजमा नेपालमा हुन्नन् । प्रत्येक वर्ष उनी आफ्नो र अरुका गरेर दर्जनौं तिज गीत गाउँछिन् । 

उनीसँगै जापानमा गुञ्जिए यसपटक प्रकाश सपुत । ‘बोल माया...’ गीतमार्फत् चर्चामा आएका उनी तिजका गीत पनि गाउँछन् र मोडलिङ पनि गर्छन् । 

अर्की लोकदोहोरी गायिका देवी घर्ती पनि यतिबेला जापानमै छिन् । सिन्जोउ कर्पोरेसनले आयोजना गरेको तिज महोत्सवमा देवी रमाइन् । आज (मंगलबार) जापानमै उनको कार्यक्रम छ । चिवा फुनाबासीमा हुने कार्यक्रममा उनले आफ्ना तिज गीत प्रस्तुत गर्दैछिन् । फेसबुकबाटै उनले जापानमा बस्ने नेपालीलाई कार्यक्रममा सहभागिता जनाउन निम्ता पनि दिएकी छन् । 
तिज क्वीन भनेर चिनिने राधिका हमाल पनि यतिबेला नेपालमा छैनन् । आज बिहानमात्रै उनले आफ्नो फेसबुक अकाउन्टमा आफूले प्रस्तुति दिएको कार्यक्रममा सहभागी नाचिरहेको भिडियो अपलोड गरेकी छन् । राप्ती समाजले सिड्नीमा आयोजना गरेको तिज कार्यक्रम सकेर उनी जापान पुगेकी छिन् । 

अब जापानमा उनले बिहुकोट समाजद्वारा आयोजित तिज कार्यक्रममा आफ्ना गीत प्रस्तुत गर्नेछिन् । उनले यो वर्ष मात्रै करिब चार दर्जन तिज गीत रेकर्ड गरेकी छन् । उनी एउटा स्टेज कार्यक्रमको डेढ लाख रुपैयाँसम्म लिन्छिन् । 

पुरुष भएर तिज गीत गाउने र चर्चा बटुल्ने गायक हुन्, पशुपति शर्मा । उनलाई हरेक वर्ष तीजमा देशदेखि विदेशसम्म भ्याईनभ्याई हुन्छ । यो वर्ष पनि उनका कार्यक्रमले निरन्तरता पाए । पशुपति यो वर्ष तिज सेलिब्रेशन–२०७५ कार्यक्रमका लागि अष्ट्रेलिया पुगे । उनीसँगै यो कार्यक्रममा देवी घर्ती, मञ्जु पौडेल पनि थिए । अष्ट्रेलियाको कार्यक्रम सकेर पशुपति शर्मा दिल्लीको तिज कार्यक्रममा पनि सहभागी भए । बर्सेनि अरुका लागि दर्जनौं तिज गीत तयार पारिदिने उनी यो वर्ष उनले नयाँ गीत गाए । ५ वटा गीत गाएका उनले सफलता हात पारे । सबैभन्दा धेरै युट्युबमा हेरिने तिज गीत उनकै भए । 

‘बोल माया...’ गीत गाएर आफूलाई अझ बढी दर्शक तथा स्रोतामाझ पुर्याएकी शान्तिश्री परियारलाई पनि यो तिज राम्रै लाग्यो । रोल्पा, प्युठान र दाङ समाजले संयुक्त रुपमा युएईमा आयोजना गरेको कार्यक्रममा उनले आफ्नो प्रस्तुति दिइन् । शान्तिश्रीले अहिले देशका मात्रै होइन, विदेशका कार्यक्रममा पनि थुप्रै अवसर पाउँदै आएकी छन् । 

सुनिता दुलाल पनि तिजमा व्यस्त हुने गायिका हुन् । यो वर्ष पनि उनलाई तीजको कार्यक्रमले छोडेनन् । अष्ट्रेलिया, अमेरिका हुँदै आयरल्यान्ड र युकेसम्मका आयोजकले उनलाई बोलाए । 

उनको तिज कार्यक्रम झापा र काठमाडौंमा पनि थिए । अष्ट्रेलिया गएर गीत गाएपछि उनलाई स्वास्थ्यले साथ दिएन । अघिल्लो हप्ता उनले ग्राण्डी इन्टरनेशनल अस्पतालमा उपचार गराइरहेको तस्बिर आफ्नो फेसबुक एकाउन्टमार्फत् सार्वजनिक गरिन् । उनले तस्बिरसँगै आफू स्वास्थ्यका कारण कार्यक्रममा उपस्थित हुन नसकेको भन्दै आयोजकसँग माफी पनि मागिन् । उनी अहिले घरमै रेष्ट गरिरहेकी छन् ।

०६४ सालदेखि तिजका गीत गाउन थालेका लोक दोहोरी गायक खुमन अधिकारीको पोल्टामा पनि यो वर्ष विदेशका तिजका कार्यक्रम थुप्रै परे । यो वर्ष तीजका मात्रै ३० वटा गीत गाएका उनको भागमा अष्ट्रेलिया, दुवई, जापान र इजरायलका कार्यक्रम परे । 

अहिले उनी जापान पुगेका छन् । टोकियोको निप्परीमा आयोजना हुने कार्यक्रममा उनले तिजका गीत गाउने छन् । खुमनसँगै निप्परी स्टेशनको सोनी हलमा शोभा त्रिपाठी र राजन कार्की पनि गुञ्जिने छन् । तिज धमाका—२०१८ नाम दिइएको उक्त कार्यक्रम अपाङ्ग तथा असहायहरुको सहयोगार्थ भनिएको छ । 

थुप्रै गायकगायिका यतिबेला तिज कार्यक्रमका सिलसिलामा नेपाली रहेका विभिन्न देशमा पुगेका छन् । नेपाली बसोबास गर्दै आएका अधिकांश देशमा तिज कार्यक्रम हुने गरेका छन् । यी कार्यक्रममा तिज गीत गाउने कलाकारलाई प्रवासी नेपालीले बोलाउने गरेका छन् । प्रवासमा तिज कार्यक्रम एक–डेढ महिनादेखि हुँदै आएका छन् । यसका कारण तिजमा तिज गायकगायिकालाई नेपालमा हम्मेसी भेट्टाउन सकिँदैन ।

तपाईंको मत