Skip Advt.

राजनीति

देउवा र पौडेलपक्षबीच विवाद, केन्द्रीय समिति बैठक बस्नै सकेन 

देउवा र पौडेलपक्षबीच विवाद, केन्द्रीय समिति बैठक बस्नै सकेन 

काठमाडौं । नेपाली कांग्रेसभित्र अनुशासन समिति गठनको विषयमा विवाद देखिएको छ ।  अनुशासन समिति गठनका लागि बिहीबार बोलाइएको केन्द्रीय समितिको बैठक बेलुकासम्म पनि सुरु नभएपछि अनिश्चितकालका लागि स्थगित गरिएको छ ।
अनुशासन समिति गठनको विषयमा सभापति शेरबहादुर देउवा, वरिष्ठ नेता रामचन्द्र पौडेल र ‘तेस्रो धार’ को नेतृत्व गर्दै आएका नेता कृष्णप्रसाद सिटौलाबीच मतान्तर देखिएको भए पनि खास विवाद देउवा र पौडेलबीच नै रहेको कांग्रेसका एक केन्द्रीय सदस्यले जानकारी दिए ।

स्रोतका अनुसार पाँच सदस्यीय समिति गठनका लागि सभापति देउवाले वरिष्ठ नेता पौडेललाई दुईजना सदस्यको नाम दिन आग्रह गरेका थिए । तर पौडेलले समितिको संयोजक कसलाई बनाउने भन्ने बारेमा छलफल हुनुपर्ने अडान राखेर नाम उपलब्ध गराएका छैनन् । देउवाले संस्थापन पक्षबाट भिष्मराज आङदम्बे, किशोरसिँह राठौर र वीरबहादुर बलायरलाई समितिमा राख्न चाहेको स्रोतको भनाइ छ ।

त्यसमा आङदम्बेलाई अनुशासन समितिको संयोजक बनाउन देउवाले प्रस्ताव गरेका थिए ।  

‘‘वरिष्ठ नेताले अनुशासन समितिको संयोजक वरिष्ठ व्यक्तिलाई बनाउनुपर्ने र त्यसका लागि सभापति र आफूबीच छलफल हुनुपर्ने अडान राख्नुभयो,” एक केन्द्रीय सदस्यले बाह्रखरीसँग भने, ‘‘सभापतिले संयोजकका बारेमा किन छलफल गर्ने तपाईं दुई जना सदस्यको नाम दिनुस् न भनिरहनुभएको थियो, तर पौडेलले छुट्टै छलफल गर्ने भनेर महामन्त्री शशांक कोइराला र कोषाध्यक्ष सीतादेवी यादवसँग छलफल गरेपछि प्याकेजमै सबै कुरा गर्नुपर्छ भन्नुभयो ।’’ 

अनुशासन समिति गठनका विषयमा नेता सिटौलाको छुट्टै धारणा देखिएको छ । उनले केन्द्रीय कार्यसमितिको बैठकबाट गठन भएको केन्द्रीय सदस्य रमेश रिजाल संयोजकत्वको समितिलाई पहिले विघटन गरेर मात्रै पुनर्गठन गरिनुपर्ने तर्क गरिरहेका छन् । 
रिजालको संजोजकत्वमा रहेको अनुशासन समिति विघटन नगरी पुनर्गठन गर्न नमिल्ने सिटौलाको भनाइ रहेको स्रोतले जानकारी दिएको छ । 

रिजालको संयोजकत्वमा गठन गरिएको उक्त समितिमा हृदयराम थानी, कमला पन्त, सुरेन्द्र पाण्डेय र उमाकान्त चौधरी सदस्य थिए । 

जसमध्ये रिजालले पदबाट राजीनामा दिइसकेका छन् भने थानी र पन्तले समितिमा नबस्ने बताइसकेका छन् । यसैगरी नेता पाण्डेयले आफू राष्ट्रियसभामा प्रतिपक्षी दलको नेता भइसकेकाले समितिमा बस्न नसक्ने बताएका छन् । 

स्रोतका अनुसार नेता सिटौला अनुशासन समिति विघटन गर्ने निर्णय केन्द्रीय कार्यसमिति बैठकबाट नगर्ने भए रिजाल संयोजकत्वमा गठित समितिमा रहेका एक्ला सदस्य चौधरीको संयोजकत्वमा पूर्णता दिनुपर्ने पक्षमा देखिएका छन् । 
‘‘कि त पहिला समिति भंग गर्ने निर्णय गरिनुपर्छ । होइन भने समितिमा बाँकी रहेका उमाकान्त चौधरीको संयोजकत्वमा समितिलाई पूर्णता दिनुपर्छ भन्ने अडान राख्नुभएको छ,” स्रोतले भन्यो । 
यसअघि भदौ २२ गतेका लागि बोलाइएको केन्द्रीय कार्यसमिति बैठक तयारी नपुगेको कारण देखाएर बिहीबारका लागि सारिएको थियो ।   
 

तपाईंको मत