Skip Advt.

खेल

सर्वाधिक राशीको अन्तर्राष्ट्रिय फुटबल प्रतियोगिता हुँदै

सर्वाधिक राशीको अन्तर्राष्ट्रिय फुटबल प्रतियोगिता हुँदै

काठमाडौं । मदन भण्डारी अन्तर्राष्ट्रिय फुटबल प्रतियोगिता माघ दोस्रो साता हुने भएको छ । मदन भण्डारी स्पोर्टस एकेडेमीको आयोजनामा माघ ९ गतेदेखि १९ गतेसम्म सर्वाधिक पुरस्कार राशीको अन्तर्राष्ट्रिय फुटबल प्रतियोगिता हुन लागेको हो । 
काठमाडौंमा पत्रकार सम्मेलन गरी आयोजकले प्रतियोगितामा ४ विदेशी टोली र दुई नेपाली टिम समावेश गर्ने जानकारी दिएको छ । 

नेपालबाट रातो र निलो गरी दुईटिम बाँकी ४ टिमका लागि भुटान, बंगलादेश, भारत, थाइल्याण्ड र चीनलाई पत्रचार गरेको आयोजकले जनाएको छ।   प्रतियोगितामा भुटानको यु–२३ टिम आउने पक्का भएको र बाँकी पत्राचार गरेका टिममध्ये सबै आए सबैलाई समावेश गर्ने नभए ४ टोली सहभागी हुने आयोजकको भनाइ छ । 

दशरथ रंगशालामा संचालन हुने प्रतियोगितामा ६ टोलीलाई दुईसमूहमा विभाजन गरी लिगका आधारमा खेलाइनेछ । समूहको शीर्ष दुईमा रहने टोली सेमिफाइनलमा प्रवेश गर्नेछन् । नेपाली खेलाडीलाई अन्तर्राष्ट्रिय एक्सपोजर दिने उद्देश्यले प्रतियोगिता आयोजना गर्न लागिएको एकेडेमीका अध्यक्ष विनोद श्रेष्ठले जानकारी दिए । 

खेलाडीको क्षमता बृद्धिसँगै भूकम्पपछि पुनर्निर्माणको क्रममा रहेको दशरथ रंगशालाको समयमै निर्माण सम्पन्न गर्न दबाब दिने उद्देश्य रहेको श्रेष्ठको भनाइ छ । लामो समयदेखी दशरथ रंगशालामा अन्तर्राष्ट्रिय खेल हेर्न नपाएका दर्शकलाईसमेत राहत हुने आयोजकको दाबी छ ।

करिब एक करोड ५० लाख खर्च हुने अनुमान गरिएको प्रतियोगिता विजेताले २५ हजार अमेरिकी डलर, दोस्रो हुने टोलीले १० हजार डलरसहित ट्रफी र मेडल पुरस्कार पाउने छन् । यस्तै विधागततर्फ उत्कृष्ट हुने गोलकिपर, डिफेन्डर, मिडफिल्डर, फरवार्ड र प्रशिक्षकलाई जनहि १ हजार अमेरिकी डलर पुरस्कार प्रदान गर्ने आयोजकले जनाएको छ । 
 

तपाईंको मत